ಮನವಿ

ನಡೆವ ಹಾದಿಯಲಿ
ನೀ ಜೊತೆ ಸೇರಲು
ಈ ಬಾಳು ಸುಮಧುರ.
ರೆಪ್ಪೆಯೊಳಗೆ
ನೀ ಮೂಡಿರಲು
ಮಾತೇ ಮರೆತಿಹುದು ನನ್ನಧರ.

ಈ ಎದೆಯು ಹಸಿದಿರಲು
ಪ್ರೀತಿಯ ತುತ್ತನುಣಿಸದೆ
ಮರೆಯಾಗುವೆಯೇತಕೆ
ಓ ಪ್ರೇಮ ದೀಪಿಕೆ.
ಮನವು ನಿನ್ನ
ನೆನಪಿನಲ್ಲೆ
ಕಳೆಯುತಿಹುದು ಕ್ಷಣ ಕ್ಷಣವನು.

ನೀನು ಉಸಿರ ಮರೆತರೆ
ಇರುವನೆಂತು ನಿನ್ನಿನಿಯನು.
ಒಡಲಿನೊಳಗೆ ನೂರು ಕನಸ
ಹೊತ್ತದೆಂತು ಮಲಗಿಹೆ
ಹೀಗೆ ನೀನು ಸುಮ್ಮನೆ.

ಏಕೋ ಕಾಣೆ
ಮನ ಬಯಸಿಹುದು
ನಿನ್ನ ಮಡಿಲನು
ನಮ್ಮ ನಾವೇ ಮರೆವ ಸುಖವನು.

ನಿನ್ನ ಮೌನ
ತೊರೆಯಬಾರದೆ
ಬರುವೆಯೆಂದು ಹೇಳಬಾರದೆ
ನಮ್ಮ ಕನಸ ಮಹಲಿಗೆ.