ಒಲವೇ ..

ಎಲ್ಲಿರುವೆ ಒಲವೇ
ಸವಿ ಕ್ಷಣದ ಒಸರೇ..
ಯಾವ ಹಾಡಿನ ಸಾಲಲಿ
ಯಾವ ಸಂಭ್ರಮದ ಕಡಲಲಿ.
ಎಲ್ಲಿರುವೆ ..ಎನ್ನ ಪದಗಳ ಜೀವವೇ..

ನಿನ್ನ ಮೃದುಲ ಸ್ಪರ್ಷಕೆ
ಈ ಒಡಲ ಕಾತರಿಸಿಹುದು
ಪ್ರತಿಕ್ಷಣಕು ನಿನ್ನದೇ ಹಂಬಲ.
ಎಲ್ಲಿರುವೆ... ನನ್ನ ಮಂದಹಾಸವೇ..
ಹೇಗಿರುವೆ ಒಲವ ಸಾಕ್ಷಾತ್ಕಾರವೇ

ಪ್ರೇಮ ಭಿ ಕ್ಷೆ

ಪ್ರೀತಿಸ ಬೇಡ
ಎನ್ನ ತೋಳ ತೆಕ್ಕೆಯಲಿ
ನಿನ್ನ ಮೌನದಲ್ಲಡಗಿಹ
ಕಂಬನಿಗಳ ಸಾಲು ಜಾರಿದರೆ ಸಾಕು.

ನಿನ್ನ ಮೌನದಲ್ಲಡಗಿಹ
ಆ ಅದೃಶ್ಯ ಬಣ್ಣಗಳ
ಚಿತ್ತಾರವ ನೆನಪಿಸಿಕೊಂಡರೆ ಸಾಕು.

ನಿನ್ನ ಮೌನದಲ್ಲಡಗಿಹ
ಬರಿಯೆ ನೀನು ಸಾಕು.

ರೆಕ್ಕೆ ಕಳಚಿ ಒಮ್ಮೆ ಬಾ..

ಜೋಗುಳದಿಂದ- 4

ಕಣ್ಣ ನೋಟದಲ್ಲೇ
ನೂರು ಪದವ ಚೆಲ್ಲಿ
ಎನ್ನ ಮನವ ಕದ್ದ
ಚೋರಿ ನೀನು.

ದುಂಡು ಮೊಗದ
ಮಲ್ಲಿಗೆ ಮೊಗ್ಗು
ನೀ
ಮುನಿದರೂ ಬರೀ
ಕೆಂಡ ಸಂಪಿಗೆ.

ಹೂವ ಕಂಡು
ಮರುಳುಗೊಂಡೆ
ಮನದ ತುಂಬ
ನಿನ್ನ ಪರಿಮಳ
ತುಂಬಿಕೊಂಡೆ

ಜೋಗುಳದಿಂದ- 3

ಮನದ ಬನದ
ತುಂಬೆಲ್ಲ ನಿನ್ನದೇ
ಕನಸುಗಳು.
ಕಣ್ಣ ಕೊಳದೊಳಗೆ
ಬರಿ ನಿನ್ನದೇ
ಚಿತ್ರಗಳು.

ಮಾತ ಮರೆತು
ಮೌನ ಉಲಿಯುತಿಹುದು
ಉಸಿರ ಮರೆತು
ಮನವು ಮಿಡಿಯುತಿಹುದು ನಿನಗಾಗಿ.
ಕಣ್ಣಲಿ ಕಣ್ಣಿಟ್ಟು
ಒಮ್ಮೆ ನೋಡಿದರೆ
ಅಷ್ಟು ಸಾಕು
ನಮ್ಮ ಪ್ರೆಮ ಪರ್ವದ
ನಾಂದಿಗೆ.

ಜೋಗುಳದಿಂದ- 2

ಸ್ನೇಹ ಚಿಗುರಿ
ಪ್ರೀತಿ ಬಲಿಯುವ ಮುನ್ನ
ಹಾಗೆ ಮಾಯವಾದೆ
ಏಕೆ ನನ್ನ ನಲ್ಲೆ.

ನನ್ನ ಕನಸ ಮಹಲಿನಲ್ಲಿ
ರಾಣಿಯಿಲ್ಲದ ರಾಜ ನಾನು
ಉರುಳುತಿರುವುದು
ದಿನವೂ, ಮಹಲೂ
ಬರೀ ನಿನ್ನ ನೆನಪಿನಲ್ಲೇ.

ಜೋಗುಳದಿಂದ- 1

ಏಕೋ ಕಾಣೆ
ಮನವು ಗುನುಗುತಿರುವುದು
ಸದಾ ನಿನ್ನ ಹೆಸರ
ಎದುರಿಗಿರಲು ನೀನು
ಹೇಳಲಾರದೆ ಕಾಡುತಿರುವುದು
ಮನವ.

ಕಾಯುತಿರುವೆ ನಾನು
ಮೌನ ಮಾತಾಗುವ
ದಿನವನು
ನಿನ್ನ ಎದೆಯೊಳಗೆ
ನಾ ಸೇರುವ
ಕ್ಷಣವನು

ಓ ಪ್ರಾಣ ಸಖಿ..

ದೂರದೂರಿನಲಿ
ಹಸಿರ ಮೌನದಲಿ
ಬಾಳ ಹಾದಿ ಕಂಡೆ
ಸುಂದರ ಸುಮಧುರ
ಜೀವನಯಾನಕೆ
ನೀನೇ ಜೊತೆ ನನಗೆಂದೆ.

ಪ್ರೇಮ ಕಾವ್ಯ ಬರೆಯಲು
ನಿನ್ನ ನೋಟ ರಾಗವಾಗಿ
ಎದೆಯ ಮಿಡಿತ ತಾಳವಾಗಿ
ಅಲೆ ಅಲೆಯಾಗಿ ತೇಲಿ ಬಂದು
ಮೌನ ಗೀತೆ ಮಿಡಿಸಿ
ನಡೆವ ಹಾದಿಗೆ ಒಲವ ಮತ್ತೇರಿತು.

ಮನದ ಮಂದಿರದ
ಮಂದಾರ ನೀನು
ಕಂಪ ಮರೆತು ಉಳಿದೆ
ಎದೆಯ ಗುಡಿಯಲ್ಲಿ
ಪ್ರೇಮ ದೀಪವನು ಬೆಳಗಿ
ನೀನೆತ್ತ ನಡೆದೆ.

ಪ್ರೀತಿ ಹಸಿವು
ಹಂಬಲಿಸಿ ಒಡಲಿನಲಿ
ಬಳಲಿ ಬೆಂಡಾಗಿ ಕಾಡಿದೆ
ತುಂಬಿ ನನ್ನೊಳಗೆ
ನಿನ್ನ ತಿಳಿಬಿಂಬ
ಕ್ಷಣವು ಯುಗವಾಗಿ ಕಾಡಿದೆ.

ಮನದ ಮಹಲು
ನನಸಾಗಿ ತಳೆದಿರಲು
ನೀ ಇರದೆ ಈ ಬಾಳ್ವೆಯು
ಮಡಿಲ ತೊಟ್ಟಿಲಲಿ
ಮಗುವು ಉಲಿಯದೆ
ಇದು ಬರಿಯೆ ಚಿತ್ರಪಟವು.

ಉಸಿರ ಮರೆತು ನೀನಿರುವುದೆಂತು
ಕನಸ ಕಳೆದು ನಾನಿರುವುದೆಂತು
ಜೀವ ಸಖಿ ಓ ಪ್ರಾಣ ಸಖಿ
ಕಸುವು ತಂಬಿ
ತುಂ ತುಂಬಿ ತುಂಬಿ ಬಾ
ಎದೆಯ ತಣಿಸೆ
ತುಂ ತುಂಬಿ ತುಂಬಿ ಬಾ
ಜೀವ ಸಖಿ ಓ ಪ್ರಾಣ ಸಖಿ.